భారత్‌లోని ‘స్నేక్ హాట్‌స్పాట్స్’.. ఈ రాష్ట్రాలకు వెళుతున్నారా? జాగ్రత్త!

భారతదేశం వన్యప్రాణి వైవిధ్యానికి ప్రసిద్ధి. ముఖ్యంగా దేశంలో 300కు పైగా పాము జాతులు ఉన్నాయి. అధికారికంగా ఏ రాష్ట్రంలో పాములు ఎక్కువగా ఉన్నాయనే జాబితా లేనప్పటికీ, జీవవైవిధ్య అధ్యయనాల ప్రకారం కొన్ని రాష్ట్రాలు ‘స్నేక్ హాట్‌స్పాట్స్‌’గా మారాయి. వన్యప్రాణి ప్రేమికులు, పర్యాటకులు ఈ ప్రాంతాలకు వెళ్లేటప్పుడు అప్రమత్తంగా ఉండాలని నిపుణులు సూచిస్తున్నారు.

పశ్చిమ కనుమలు విస్తరించి ఉన్న కేరళ, కర్ణాటక, మహారాష్ట్ర, తమిళనాడు రాష్ట్రాల్లో పాముల సాంద్రత చాలా ఎక్కువ. ముఖ్యంగా కేరళను 'భారతదేశ పాముల వైవిధ్య రాజధాని'గా పిలుస్తారు. ఇక్కడ కింగ్ కోబ్రా, మలబార్ పిట్ వైపర్ వంటి అరుదైన జాతులు కనిపిస్తాయి. కర్ణాటకలోని అగుంబే ప్రాంతం "కోబ్రా రాజధాని"గా పేరుగాంచింది. మహారాష్ట్రలోని ముంబై, పూణే వంటి నగరాల్లోనూ వర్షాకాలంలో పాములు ఎక్కువగా కనిపిస్తాయి.

పశ్చిమ బెంగాల్‌లోని సుందర్బన్స్, అస్సాంలోని కజీరంగా, ఒడిశాలోని సిమ్లిపాల్, ఉత్తరాఖండ్‌లోని జిమ్ కార్బెట్ నేషనల్ పార్క్ పరిసర ప్రాంతాలు కూడా పాములకు నిలయాలు. ఈ ప్రాంతాల్లో కింగ్ కోబ్రా, రస్సెల్స్ వైపర్ (రక్తపింజరి), కట్లపాము (క్రైట్) వంటి విషపూరిత సర్పాలు ఎక్కువగా సంచరిస్తుంటాయి.

ఈ రాష్ట్రాల్లోని అటవీ ప్రాంతాలు, జాతీయ పార్కులను సందర్శించే పర్యాటకులు తప్పనిసరిగా కొన్ని జాగ్రత్తలు తీసుకోవాలి. అడవుల్లోకి వెళ్లేటప్పుడు కాళ్లకు పూర్తిగా కప్పి ఉండే షూస్ ధరించాలి. అనుభవం ఉన్న స్థానిక గైడ్ లేకుండా ఒంటరిగా వెళ్లకూడదు. ముఖ్యంగా రాత్రి వేళల్లో ప్రయాణాలు, ట్రెకింగ్ చేయడం ప్రమాదకరం. పొరపాటున పాము కనిపిస్తే, దానిని రెచ్చగొట్టకుండా, సురక్షితమైన దూరం పాటించడం ఉత్తమం. సరైన జాగ్రత్తలు తీసుకుంటే ఎలాంటి ప్రమాదం లేకుండా ప్రకృతిని ఆస్వాదించవచ్చని నిపుణులు చెబుతున్నారు.